11 лістапада па ініцыятыве міжнароднай экалагічнай сеткі "Школьны праект па выкарыстанні рэсурсаў і энергіі" (SPARE) аб'яўлены Днём энергазберажэння (International Day of Energy Saving).
На міжнароднай нарадзе каардынатараў SPARE, якая праходзіла ў Казахстане ў красавіку 2008 года, было прынята рашэнне аб заснаванні гэтага свята. У тым жа годзе свет адзначыў першы Дзень энергазберажэння, свята атрымала статус міжнароднага, паколькі ўзяць удзел у праекце пажадалі каля 20 краін.
Асноўная мэта мерапрыемства - прыцягнуць увагу ўладаў і грамадскасці да рацыянальнага выкарыстання рэсурсаў і развіцця аднаўляльных крыніц энергіі. Энергазберажэнне дазваляе зменшыць нагрузку на навакольнае асяроддзе і прадухіліць экалагічнае забруджванне.
У нашай краіне больш за 27 гадоў паслядоўна праводзіцца дзяржаўная палітыка ў сферы энергазберажэння. Упраўленне ажыццяўляе ўпаўнаважаны рэспубліканскі орган, якім з'яўляецца Дэпартамент па энергаэфектыўнасці Дзяржаўнага камітэта па стандартызацыі Рэспублікі Беларусь.
Адна з найважнейшых задач, якія стаяць перад дэпартаментам -папулярызацыя эканамічных, экалагічных і сацыяльных пераваг эфектыўнага выкарыстання паліўна-энергетычных рэсурсаў, садзейнічанне выкарыстанню мясцовых відаў паліва, у тым ліку аднаўляльных крыніц энергіі. Выступаючы ў якасці нагляднага і кантрольнага органа выканання праграм, мерапрыемстваў і мэтавых паказчыкаў энергазберажэння, дэпартамент адначасова займаецца распаўсюджваннем інфармацыі аб спосабах і практычных выніках эканоміі паліўна-энергетычных рэсурсаў.
Акрамя таго, энергазберажэнне выгадна эканамічна. Мерапрыемствы па эканоміі энергарэсурсаў у два з паловай-тры разы таннейшыя, чым вытворчасць і дастаўка спажыўцам такой жа колькасці зноў атрыманай энергіі. Тым больш, што самыя простыя і элементарныя меры энергазберажэння даступныя кожнаму і могуць быць ужыты ў побыце фактычна паўсюдна.
Штогод у Беларусі да Міжнароднага дня энергазберажэння арганізуецца шэраг тэматычных мерапрыемстваў (семінараў, канферэнцый, круглых сталоў), на якіх у якасці лектараў выступаюць як беларускія эксперты, так і прадстаўнікі міжнародных кампаній. Таксама арганізуюцца вулічныя акцыі, трансляцыя сацыяльнай рэкламы на тэлевізійных каналах і ў грамадскім транспарце, прэс-туры на аб'екты энергазберажэння.
Ва ўстановах адукацыі ў гэты дзень праходзяць адкрытыя ўрокі і інфармацыйныя гадзіны з удзелам кіраўнікоў мясцовых органаў улады, праводзяцца конкурсы малюнкаў і займальныя віктарыны.
З метадычнымі рэкамендацыямі, навучальнымі дапаможнікамі, а таксама практычнымі спосабамі эфектыўнага выкарыстання энергарэсурсаў у побыце можна азнаёміцца на афіцыйным сайце Дэпартамента па энергаэфектыўнасці.
Штогод Брэсцкая вобласць прымае ўдзел у Рэспубліканскім конкурсе "Энергамарафон", які арганізуе Дэпартамент па энергаэфектыўнасці з мэтай распаўсюджвання эфектыўнага вопыту работы ўстаноў адукацыі па арганізацыі энергазберажэння.
